0

Nemo & No-Name?!

Vandag het hierdie Lemoenpit sy eerste troeteldiere gekry!  Nemo en No-Name.  

Harmen was so opgewonde en gaan loer gedurig of hul nog ‘ok’ is!

Mamma wou natuurlik baie ouliker name kies.  Iets soos Kerrie & Borrie of Flip & Flop.  Wel, na ons by Paprika & Masala gaan draai het en nie kon ooreenstem op n naam nie.  Volstaan ons nou met Nemo & No-Name!  Harmen was vasbeslote en hoe dan nou anders, die oranje een is Nemo!!!

Tot n volgende keer, bly borrel…

 

Advertisements
3

Blommekind!

Wow!  Ek kan nie glo hoe die tyd vlieg!  Daar het heelwat gebeur die afgelope twee maande.  Sodoende dat ek so baie te vertele het, maar amper nie weet waar om te begin.

Dit gaan baie goed met Harmen, ‘n voorspoedige seuntjie.  Die lyfie raak nou die van ‘n seuntjie, niks meer baba, peuter of selfs kleuter aan die mannetjie nie.  Ook die geselsies.  Juis vandag sit ons in Wimpy en so ewe sê Harmen, ‘Ons sit by die lughawe’!  Dit is waar hy Wimpy vandaan ken, lank-lank gelede! 🙂

Harmen is ‘n seuntjie met ‘n sterk wil.  Alhoewel dit soms ‘n struikelblok is, weet ek dit sal vir hom ‘n aanwins wees in die wêreld daar buite.  Harmen pak ‘n taak aan met ywer en geditermineerdheid.  

Harmen is ‘n netjiese seuntjie.  Hy speel rof en tjof en met ALLES, maar alles het sy regte plek en mag ook nie meng.  JCB’s en Trekkers is die gunstelinge, naas sand en buite speel.  Dan soos dit ‘n seuntjie betaam, lego en karre!

Pure seuntjie, is die knieë nerf af asook naëls vol sand met vreugde en vrede in die hart.

Harmen is mal ook sy nuwe neef en nig.  Die interaksie tussen hul is dierbaar en beter as enige ‘block-buster’ film!

Die tablet word so nou en dan uitgeruk, veral wanneer energie belaaide seuntjies doodstil moet sit!  Hy is versot op sy ‘klablet’, veral omdat dit so skaars is.

Van vorms en kleure kan jy hom niks vertel.  Selfs sy naam herken hy en skryf die ‘H’ al self.  Ons volgende oefening is die volle naam.

Mamma en Pappa word deesdae aangespreek as ‘Mamma Ilze’ en ‘Pappa Herman’.  Pappa Herman het hom bekend gestel aan Robbie Wessels se ‘Peri Hoenor’ en die liedjie word kliphard en oral gesing!  Ja, selfs die kerk!!!

Pappa Herman het ook Harmen bederf met ‘n kuier aan die Western Province Live Steamers.  Wat ‘n fees!  Dis ‘n moet vir enige seuntjie, Oupa en Pappa!  Moet sê die wind deur my hare was nogal lekker.  😉

Sommer vir die ‘onthou’:

Harmen weeg +23kg

1.05m lank

Slaap vanaf 20h00 tot 06h30, soms 07h00 as na 20h gaan slapies het.  Met ‘n middag-slapie by die skool.

Dra al 4 – 5 jaar en tans nommer 10 skoene

Harmen is super lief vir sy warm ‘tops’ met ‘n ‘hoodie’ en sakke.  Wegsteek plek vir klippies en stokkies!  Tekkies is ‘n wenner en slippers ‘n moet!  Alhoewel kaalvoet is die beste vir die gemoed!

Nou moet ek eers daardie swart voetjies gaan skrop, Bernard en sy bedjie roep!  

Tot volgende keer…

1

Deel ons kindwees met Harmen!

Vannaand het ons, ons klein Kabouter bekend gestel aan ons kinderdae gunstelinge!  ‘Neels Holgerson’…  Episode 1, 2, 50, 51, 52.  Vasgenael en met n stywe druk… Aan die einde is Neels toe met ‘rus’ gelaat, by sy Pappa & Mamma.  Grootseun wat hy geword het!  More aand is dit Niklaas!  Dawie die Kabouter se temalied het ons geluister, maar na 30 jaar sien ek nog nie kans vir nog n finale episode waar Dawie in n boom verander nie!  Ons spaar Harmen die hartseer nog  rukkie. 

0

Groot Meneer Gesprekke!

Groot Meneer se gesprekke is te dierbaar vir woorde!  Harmen klink al hoe meer soos ‘n groot seuntjie as ‘n peuter, selfs as ‘n kleuter.  Ons antwoorde word nou beaam met ‘n ‘Ooo’ en selfs sommer partykeer ‘n ‘goed dan’.

Sy Pa, Herman, het in die week ons bome in die tuin gesnoei.  Die son skyn te heerlik by die huis in en hoef nie meer te sukkel deur die honderde blaartjies nie.  Harmen, natuurlik was nie baie beindruk nie!  Volgens hom lyk dit nie mooi nie en moet sy Pa dit nog regmaak.  Selfs na ‘n verduideliking van ‘n boom moet ook ‘hare sny’, was die hartjie maar nog klein.

Harmen is ‘n seuntjie van 3 jaar en 2 maande, wat hy nie aldag lyk of selfs glo hy is nie!  Tans dra hy ‘n nommer 10 skoen grootte, nommer 9 was nooit eens van toepassing.  Hy dra ook meestal 4 tot 5 jaar kledingstukke, maar die baadjies neig na 5 tot 6 jaar.  Seker maar omdat alles mos vanaf die ooste kom en P. E. P. Boutique asook A. C. Kermans dink mos ons het riete vir kinders.  Kyk vet aan daardie lyfie is daar wraggies nie, maar groter koop ons groter.

Met die Knysna-Brande het ons ook donasie gestuur, dit moes by verskeie punte afgelaai word. Op daardie stadium het ons nog spesiaal Goodwood Brandweerstasie toe gery.  Die Kabouter was darem baie opgewonde om te hoor waarheen ons daardie middag sou gaan.  Min het hy geweet wat op hom wag!  Die hartjie het oorgeloop van vreugde en wou die ‘Oom Brandweerman’ sommer ‘n soentjie gee toe ons koebaai moes sê.  Harmen het so baie beleef en gesien, dit was ‘n voorreg!  Van opgerolde pype, ‘n hoed op die kop, tot selfs ‘n brandweer-trok van sy eie!  Daardie aand het Harmen as ‘n Brandweerman gaan slaap in murg en been!

Playball lê vir Harmen baie na aan die hard.  Op ‘n Dinsdag is dit een van die makliker dae om vir Harmen uit die bed te kry!  Sy rapport het ook gekom, dit is darem wonderlik wat hul alles doen en leer met so ‘n sessie!  Die vaardigheid en aanwins is vêr bo ons begrip!  Soos jul weet glo ek vas Harmen gaan nie rugby speel nie.  Ek Tennis-Tennis vreeslik!  Dit het nog nie vreeslik ingesink nie, maar ‘klieket’ is op die wenslysie vir die Kabouter!  ‘Springbok Klieket’!  🙂

Na ‘n vinnige nota, moet die ‘kliek’ eers groet!  Klein ‘kliek’ moet gaan haal word!

Vrede!

 

 

0

Amen…

Vannaand is my en Pappa se ogies sopnat met ‘Amen’ sê.

Gewoontlik is dit of Mamma en Pappa wat moet bid en Harmen wat alles beaam en in kleur en geur wil bylas…

Vannaand na badtyd is Harmen soos gewoontlik, woeps, in die bed.  Voor ons kon vra wie bid sê die Grootseun dat hy sal bid en neem ons hande sodat ons n sirkel vorm.

Hy begin:  ‘Dankie Jesus sodat ons kossies vandag kon eet.’  Net daar dink ons dis die einde van sy gebed, soos normaal, maar nee… dié woorde volg toe: ‘Dankie dat ons Jaco en Marco kon kuier, Dankie ons Ouma ‘Lies kon kuier, Dankie Pappa en  Mamma vir my baie lief is… AMEN!’ 

Vannaand gaan slaap daar n baie gelukkige seuntjie, van n feestelike Vrydag met Ouma Lies se verjaarsdag tot n prettige Saterdag saam met Pappa by Agrimark en daarna gate uit geniet by Oupa Gerrit. Word die naweek afgesluit met n kersie op die koek…  Hy kuier by Jaco en Marco!

Geseënd was ons vandag om so saam te kon kuier!  Sal dit vir altyd koester en nou verewig vir Harmen en Anet!  xxx

0

My Lemoenpitjie raak by die dag groter.  Soos uit sy mond:  ‘Ek’s nie baba, ek’s grootseun’!

Anet Cornelia Lotz is gebore!  Wat n pragtige soet dogtertjie!  Harmen noem haar ‘my Poppie’!  Die bekendheid van so n kleinding is nog vars, al is ons drie jaar verder!  Darem jammer hul raak so gou groot, maar midde in daardie tydperk, dankbaar vir elke geseënde week wat verby vlieg!

Harmen aardjie na sy vaartjie, is die Babbel én die Bekkie in sy verhaal.  Die kleinman is omtrent prettig met al sy sê-goed.  Harmen het die tarentale langs die pad piketale genoem.  Toe hy agterkom ons praat weer van dit en lag daaroor, word dit vinnig tarentale, met n uitdrukkingsgesiggie soos iemand wat n hap aan n suurlemoen neem.

Gisteraand sien hy n begaafde seuntjie wat die klavier speel.  Skielik sê hy:  ‘Die seuntjie het baie hande!’  Priceless!

Bernard is sy goeie vriend en alhoewel Bernard n voorbeeld is, kan die beertjie ook maar stout raak.  Dan is dit stoeltjie toe en daar sal hy sit!  Mamma self was n dag of wat terug gevang met n lelike woord wat geuiter was.  Voorland, stoeltjie.  Dankbaar dat ek nie n goeie gedeelte van amper n uur moes sit nie, maar n skamele 3 minute.

Lampie en Bulby, is steeds die heros by die kerk!  Was die kleinman nou bly om na n lannng vakansie hul weer te sien.  Hy het ook in die vakansie verjaar en dus gehardloop vir die oorhandiging seremonie van n chomp!

Harmen het sy tweede uitslaap aand gehad by Ouma en Oupa Dunn.  Grootseun soos hy is, nie eens sy Pappa of Mamma gesoek!  Hy het selfs soos Oupa Connie, kaal bolyf aan die slaap geraak.

Harmen is n aktiewe seuntjie. Hy sê gedurig hoe hy oefeninge doen, en gooi die lyfie lank uit teen die bank en doen strek oefeninge.  Hy gaan, volgens hom, vir die Springbokspan speel.  Hy gaan vinnig hardloop!  Ai, Mamma hoop verniet dat dit n atletiese hardloop is.

Vir nou groet die Mamma🚼 met n stringpêrels om haar nek, n geskenk vir Moedersdag… en twee diamante in my hart!