0

Baie water in die see… of sal ek sê baie water in die tenke…

Sjoe, baie dinge het gebeur in drie maande. Jul kan aflei min tyd vir klein dingetjies soos ‘blogs’… haha 🙂

Dit gaan sommer baie goed met ons GROOT lemoenpit. Hy het April vier jaar oud geword en het dit gevier met T-Rex, Dino, familie en maats. Daar was sommer n paar Poppekas maats wat kom saamspeel het. Dit het gesorg vir groot opwinding.

Soos elke jaar, het die jaar met n ‘bang’ afgeskop. Tipies mens, probeer mens alles beplan en die beste besluite neem vir jou en jou kind. Wel, so probeer jy. Ons moes aan die begin van die jaar van skool skuif omdat die omgewing n negatiewe impak op Harmen gehad het. Om nou nie derms uit te ryg of jul te verveel met die feite van arbeidsterapeute, spelterapeute, ens. nie, is Harmen nou in n ander skooltjie. Baie gelukkig en regtig n positiewe invloed in die kleinman se lewe. Daar is steeds uitdagings, so sou ons begin besef – is die verloop van ouerskap, maar Harmen voel baie tuis in sy Goggaklas.

Harmen kom met die oulikste sê-goed voor n dag, bv. ‘Sê vir Harmen dankie’; ‘Sê my dadelik jammer’ en my persoonlike gunsteling: ‘ek is so baie lief vir jou’

Harmen teken ook die pragtigste prentjies. Dis kosbaar om te sien oor n tydperk hoe strepe, sirkels word en mannetjies lyfies kry met oë, neuse en monde. Die detail is versommend.

Buitemuurse aktiwiteite het ook bietjie verander en swem die Kabouter graag. Ook Vrydae is daar Stretch & Grow wat aangebied word by die skool. Harmen verwar dit so bietjie met ‘Bak & Brou’. Ook geniet hy die sangklasse, veral as hul instrumente bespeel.

Daar is n spesiale tydjie gedurende die week wat elke kind n ‘one on one’ sessie met die Juff. kry. Dis amper so opwindend as om klaskaptein te wees! Te dierbaar vra Harmen vir my en Herman een oggend in die motor: ‘One on One julle nou?’ Die dat ons so met mekaar praat en seker nie hom inreken nie. 🙂

Kabouter was die naweek bietjie Malgas toe. Het hy dit nou geniet. Hy het sy hart uitgespeel. Geval, afgestof en aangegaan… soos dit n seuntjie betaam. Bang, vra jy? Bang vir wat? Selfs die kalkoen het maar draaie rondom Sterling Moss geloop. Harmen was 24/7 buite en op sy balanseer fiets. Sodoende dat hy vir my vroeg die week moes noem dat sy boudjies seer is van die fiets. 🙂

Tans lees ek n boek van Dr. James Dobson, blykbaar n betroubare kenner as dit kom met die grootmaak van kinders en verhoudings in gesinne. In sy boek: ‘The Strong-Willed Child’, besef ek net weer dat hierdie unieke mens, geskape deur God, tog n sterk wil het en daaruit spruit die meeste van ons uitdagings. Dis om daardie wil te vorm tot wat God vir hom beplan en ons as ouers die gereedskap te gee om dit te vorm.

Dus ons plan: Verbreed ons kennis en win soveel moontlike inligting in. Ons as ouers deel soveel gesamentlike struikelblokke, oorwinnings, vrae en kan mekaar help by die antwoord kom.

‘Tel jou seëninge elke dag… een vir een’ Jou probleme wat soos n rots in jou pad voel is n klippie in die lewe van n ander.

Iets pragtig wat ek in sy boek gelees het:

Nou met daardie wyse woorde verlaat ek jul tot n volgende keer! Mooiloop en koester elke oomblik.

Advertisements
1

Kersfees het gekom en gegaan en so ook Nemo & No-Name.  🙂  Haha!  Toe Nemo Rev. 2 & No-Name Rev. 1 besluit om ons te verlaat het ons besluit, dis dan nou maar dit.  Dalk verkies die vissies dit so, via die rioolstelsel.

Die jaar het afgeskop en so op ‘n manier wonder ons nog wanneer en hoe.  Harmen is die jaar in sy 4-5 jarige klas / Graad RRR.  (So gepas met die ‘r’e’ wat in al die woorde ingedruk word, net omdat hy kan!)

Nogal ‘n groot verandering vir die klein lyfies.  Ewe skielik ‘n Juffrou nie meer ‘n Tannie, rye en verantwoordelikheid.  Amper te veel vir ‘n Mamma, maar dan besef jy weer hoe ‘anders’ die wêreld vandag is en val by die stroom in.

Harmen is die jaar ‘n Vissie in sy Vissieklas.  Baie trots en opgewonde.  Ja, maklik is dit nie as al die maats om jou huil agter hul Mammas en Pappas aan nie.  Ons seuntjie is wel baie sterk en probeer, en ons… hou moed.

Vakansie was heerlik!  Harmen kon laat slaap & speel na hartelus.  Kersfees het hy selfs vir Kersvader ontmoet.

Sondag het ons ‘n bederfdag beleef by Bugz Playbark in Joostenberg.  Dit is omtrent ‘n bederf!  Harmen kon nie genoeg kry van die ‘splash pool’ nie en die sandputte al om die area… ‘n groot wenner!  Ek kan dit regtig aanbeveel.  Jy het nie nodig om die ‘VIP pass te koop nie’, daar is regtig meer as genoeg te doen vir enige kind.  (Ouderdom 2 – 13 jaar)  Die verversings is net bietjie duur en dis maar waar die besigheid hul geldjie maak om alles te onderhou.  Indien jy nie extra wil uitgee op dit, eet by die huis.  🙂

IMG_20180121_124238

Natuurlik was Maandag skool toe, nie so ‘n ‘breeze’ soos die eerste paar dae nie!  Ons weet mos nou al wat wag vir ons en wie wil skooltoe na so ‘n heerlike Sondag.  Na die vakansie ‘tel’ Mamma ook darem weer en is dit so lekker om seuntjie liefde te ervaar!  Vra vir enige Mamma.  Die kleingoed maak ‘n mens op, maar met een soen of drukkie of selfs ‘n ‘ooo, maar Mamma lyk mooi’… smelt ‘n moederhart.

IMG-20180105-WA0003

Baie interessant is dit die jaar wat kinders leer knip en skryf.  Knip moet geleer word dat jy nie ‘n alle rigtings knip nie, maar na ‘n punt of in spesifieke rigting.  Ook die greep van ‘n potlood of kryt moet nie lyk of jy ‘n reuse pot met ‘n uitermate groot lepel roer nie.  Dit hoef nie nie perfek te wees nie, maar iets in die lyn van reg.  Gelukkig is die mannetjie lief vir skryf en knip, aard seker na sy Ma, so ons is halfpad daar.  Dis ook die begin van rye & hand-opsteek! (haha)

Harmen het so gegroei en dra tans ‘n nommer 12 eintlik amper nommer 13 skoen grootte.  Ook sy klere neig na die 5 tot 6 jaar en nie meer 4 tot 5 jaar nie.

IMG-20180123-WA0005

Soos jul weet is eet maar ‘n teerpunt vir Harmen.  Gelukkig gaan dit al beter en eet ons darem nou al twee etes per dag ontbyt en aandete.  Volgens die skool eet hy heerlik by die skool, maar ek het dit nog nie gesien nie.  🙂  Hoender is ook hoog bo aan die lys van eetgoed.

Behalwe Superman & Spiderman is Pappa Loodgieter een van sy helde!  Hy kan nie wag om saam met Pappa ‘loodgieterswerk’ te doen nie.  Ons wil so graag help en sy broek word vol geprop van al die gereedskap wat hy moontlik gaan benodig.

IMG-20180102-WA0021

Harmen skop die jaar weer af met Playball en kan nie wag vir vanmiddag se eerste les saam met Tannie Charmain en Tracey nie!  Die kleinman gaan ook weer begin swem en is baie opgewonde, aangesien dit ‘n ‘Playball’ swem is… Volgens hom…  Seker nie vêr verkeerd.  🙂  Ons hou jul op hoogte van die vis in die water.

Soos jul weet is water besparing op almal se lippe!  Selfs Harmen speel gister en sing … ‘spaar water – spaar water’.  Wat ‘n indruk maak ons nie op die kinders van vandag nie!  Vanaf volgende week is dit 50lt per persoon per dag en steeds bid dat God ons genadig sal wees en reën stuur.  Daar is so baie wat mens kan doen om water te bespaar en voel ek nou sleg oor al die jare se vermorsing.  So word ons ook wyser en maak die veranderinge.  Ons het die volgende begin:

  • Tenke – ons vang al te saam 4200lt reënwater op.  Op die oomblik vir wasmasjien gebruik (tussen deur), binnekort seker vir drink.  Ek sal bietjie uitluister vir daardie tablette wat jy die water mee suiwer.
  • Met elke uitstappie winkel toe vir weeklikse aankope, koop ek maar ‘n extra 5 liter water.  Kyk maar spesifiek vir water wat nie nou uit ons distrik uit kom nie.
  • Ons het ‘n gryswaterstelsel wat die wasmasjien water na die grasperk lei.  Ons kyk tans na die opsie om die spoelwater ook op te vang en dit te herwin.
  • Was skottelgoed in ‘n kommetjie.  Ja, soos jou Ouma gedoen het! 🙂  Dit werk en wanneer jy water tap en wag dat dit warm word… tap die water in die kom en nie in die drein af nie.
  • Badkamer-wasbakkraan het ‘n spesiale ‘restriction’.  Die siffie kos ongeveer R30 en verminder drasties die vloei van water.  Alhoewel dit steeds meer as genoeg is.
  • Stort, nee wat… bad maar in mekaar se water.  🙂
  • Ja… en die ‘yellow let it mellow’… Been having it!  Ons gebruik dan ook die badwater om die toilet te spoel.  TIP:  Moenie die spoelbak se deksel verwyder en die gryswater daarin gooi nie.  Jy loop die gevaar dat daardie deksel val of breek en dan moet die hele bak vervang word… wat ‘n drama.  Ook maak die gryswater ‘n lelike aanpaksel op die meganisme.  Nee-wat, gooi dit net ‘n die pan!  Dit werk en is tog maar immers wat die spoelbak ook doen.

Ag daar is nog vele meer wat kan gedoen word.  Die belangrikste is dat jy probeer en BEGIN!  Dag 0 kruip al hoe nader.

Ai, en so gebeur dit dat Mamma sommer ‘n baie onnodige ongeluk maak met die motor!  Net ‘n ligte stamp, maar der duisende rande.  Haha, tiepies!  Harmen is natuurlik al te gretig om vir almal te vertel daarvan en wil daagliks weet nou wanneer word dit reggemaak.  Wel binnekort is die paneeldokter toe en sal die nodige gedoen word.  Intussen sal ek solank ‘n kous en swart handskoene aanskaf.  Enige voorstelle vir banke met min. sekuriteit?! Haha!

IMG-20180123-WA0009

Deur die voorval het ek geleer dat ‘life happens’, maak nie saak hoe versigtig jy bestuur of dalk nie bestuur nie.  Goeie raad wat ek graag met jul deel is vra jou versekeraar oor die afkoop van die bybetaling!  Dit klink dalk na ‘n simpel extra, maar hoekom betaal jy tog versekering… tog vir die onvoorsiene.

Ek laat jul vandag met die laaste gedagte:  Soos ek vanoggend vir ‘n vriendin sê.  ‘n Gesin kan pragtig en voorspoedig voorkom/lyk.  Die waarheid is dat daar baie bakleie, worstelinge en hardewerk agter die skerms is!  Niemand is perfek.  Selfs die mamma sê:  ‘vokkendt’ – Nie trots daarop, maar dit gebeur.  Wat saak maak is dit jy weer probeer en aanhou baklei en worstel asook hardwerk ten einde vir jou en jou gesin.  Daar by saam bid en genade, genade en BAIE genade van Bo!

Mooiloop xxx

 

 

0

En toe…

pb

Dis vakansie!  Tog te lekker.  Van laat slaap, speel, speel en nogmaals speel!  Wat ‘n wen resep vir ‘n ordentlike vakansie!

Met die aanbreek van die vakansie was ek as Mamma, nogal op my senuwees.  Veral omdat ek nie met verlof kan gaan nie en ‘n seuntjie al rondom my rokspante gaan hang.  Wat toe nie die geval is nie, sover.  🙂

Die kleinman is te dierbaar en ek geniet hom baie hier by my!  Nou en dan word ek verras met ‘n soen of drukkie en woeps, daar gaan hy weer speel!  Van binne na buite, met speelgoed en kombuisgoed.  Ons het ook al Orkney Snork nie, ‘n hele paar keer gekyk en lyk of Shrek volgende is.  Pure seuntjie dié, tog te onafhanklik en so verkies hy dit!

Ons eerste projek vir die skool vakansie was om heerlike koekies te bak.  Dit was ‘n groot sukses.  Harmen het alles self gedoen.  Ek was net daar om konnekteer te speel by die oond-stasie.

koekies

Die tweede projek, nota boekies.  Hier was dit bietjie anders.  Mamma moes op ouent meeste van die werk doen, terwyl Harmen die meubels vas sellotape!  Steeds ‘n prettige idee!  😉

plak

Harmen se r’e kom ook mooi by.  Dis te pragtig om te hoor.  Elke sin word oor besin om soveel as moontlik r’e te kan gebruik!

Kersvader kan wraggies ook nie vinniger maak nie!  Kyk vir kinders is hierdie tyd van die jaar omtrent ‘n wagkamer vir pret en plesier!  Saans sit ons die kersfeesliggies aan tesame met ‘n kers en herinner ons dat die feesvieringe om die draai is.  Ons eerste ‘made in China’ boompie het toe die aftog geblaas.  En toe met ‘n meer van ‘n Suid-Afrikaanse gevoel, skep ons ‘n nuwe beter en soos Harmen sou sê GROTER boom.

Gisteraand verras Pappa Herman vir Harmen met klere wat hy gekoop het vir die kleinman!  En onmiddellik moes die Spiderman T-Hemp aan.  Na badtyd weer en daar is sommer met dit geslaap.  Vanoggend moes ek vinnig speel om dit te onderskep vir die wasmasjien.  Soos die oues van dae gesê het:  ‘Die pap is nog nie eens uit gewas nie!’

Hier is nog ‘n prettige foto wat ons geneem het speelplek hier naby!  Dit was vetpret!  Pappa en Mamma speel sommer saam!

fietse

So tussen deur die pret en plesier herinner ons onself net weer aan watter tyd van die jaar dit wel is en waaroor gaan dit alles.  Of oor Wie gaan dit alles.  Ons woon die Kerssangdiens by en Harmen trek soos ‘n ‘wyseman’ aan.  Hy vertel ook vir almal hoe mooi sy kerk lyk!  Natuurlik al die dekor en liggies!

wyseman

Soos ons weet is dit ook die tyd van die jaar wat ons ‘n bietjie meer gee as normaal.  Harmen neem ook deel.  Koekies wor verpak by die Sondagskool en gaan aan ander wat nie het nie of dalk moet werk en ons beskerm op Kersdag!

Vir nou groet ons eers, vakansie hou is harde werk!  Mens moet elke sekonde benut!

Liefde xxx

 

 

 

 

0

Ek sien nou weer die pos oor Nemo & No-Name en dink by myself, dié vissies maak dit nog!  Haha!

Eerlik-waar is ek nou nie ‘n ‘visvoet’ nie, alhoewel al die tekens die teendeel bewys.  Ek moet nogal sê die twee kruip diep in ‘n mens se hart.  Met hul eie persoonlikhede en maniere.  Hul kom selfs al nader as dit etenstyd is en moenie laat ek nader-staan, dan meen hul dit is nou sulke tyd, enige tyd.  Hul haal dan allerande toertjies uit om my te beindruk/oorreed.  Nie gedink visse weet hoe om ‘troeteldier’ te speel nie!

Hier gaan dit verder baie goed.  Dié dat Kersvader se kuiertjie al nader-staan.  Die ‘ongelowige Thomas’, in my skop nog teen die prikkels.  9 November, waarheen!  Binnekort is Harmen 4 jaar oud!  Wow!!!

Die seuntjie-lyfie is darem so groot vir sy Ma.  Alles is ‘self’!  Self koeldrank skink, self broodjie smeer, self aantrek.  Ek verkyk my aan die seuntjie pop & verkreukel my vir sy sê-goed.  Vreemd genoeg het hierdie seuntjie ‘n sterk liefde vir sy taal, Afrikaans.  Daar word maklik vir ons gesê dat hy nie daardie liedjie wil luister nie, want dit is Engels.  Ons is darem nou al by die punt waar hy die kassiere groet by die winkels.  Nou en dan, darem met ‘n ‘Thank you!’

Of dit nou van pure seuntjie-vreugde is en of ‘n liefde vir musiek, die sal ons maar later uitvind.  Alle liedjies word saam gesing.  Ek het nou die ander dag ‘n ietwat van ‘n skrik gekry.  Harmen vra my om die ‘duiwel’ liedjie te sing.  Nadat ek my probeer terug-sing het in my eie bloedgroep met al wat ‘n sondagskoolliedjie is, besef ek…  Ja, Ilze…  dit jou eie skuld.  Sing vir hom allerande Afrikaanse tema liedere van stories.  Al van baba dag af.  Die dat hy my toe vra om ‘Stille Waters’ van Lauricka Rauch te sing.  (Dit is nogal cute om te hoor hoe hy dit terug sing, maar dis sommer ‘n nota vir myself.)

Herman lag hom natuurlik ‘n papie vir my wat die woorde verdraai sodat dit pas by my wysie.  Die ‘mense op die bus kry eerder koud, as wat hul beskou’, ens.  🙂  Ag, wel… ‘sing vir my saggies’…

Kyk moenie onder ‘n wan-indruk verkeer.  Elke ouderdom het sy uitdaging.  Van ‘vloer-moer’, tot probeer, probeer en nog net een keer.  Die, ‘ek eet niks!’ of selfs die ‘ek wil nie skool-toe gaan nie!’  Almal beleef dit maar, selfs hier in ons huishouding.  Dankie tog, met ‘n maan wat sak oor ‘n iewat bedroefde oseaan van gevoelens en emosies, verskyn die son weer, vol beloftes en hoop.  En krag, baie krag!  😉

Kyk soos ons almal weet is kinders grootmaak nie vir sussies nie.  Soos elke Saterdagoggend, speel/gesels/lag ons drie nog ‘n klein–rukkie op die grootte-koningin se bed.  Vir ‘n oomblik dink ek aan die toekoms en wat Harmen en ons as ouers nog sal beleef en moet beleef.  Of ons nou wil of nie.  Vir ‘n oomblik gewonder of ek sal kan saamleef met Harmen se besluite as ‘grootmens’; sou ek die regte besluite maak as Ma…  En net daar kom troos die Here my…  ‘bring die kleine kindertjies na my toe, moet hul nie verhinder nie’…  Die res laat jy oor aan genade, geloof & gebed.

Tot volgende keer!

‘My hart klop Halleluja, Harmen sing Amen!’

 

0

Nemo & No-Name?!

Vandag het hierdie Lemoenpit sy eerste troeteldiere gekry!  Nemo en No-Name.  

Harmen was so opgewonde en gaan loer gedurig of hul nog ‘ok’ is!

Mamma wou natuurlik baie ouliker name kies.  Iets soos Kerrie & Borrie of Flip & Flop.  Wel, na ons by Paprika & Masala gaan draai het en nie kon ooreenstem op n naam nie.  Volstaan ons nou met Nemo & No-Name!  Harmen was vasbeslote en hoe dan nou anders, die oranje een is Nemo!!!

Tot n volgende keer, bly borrel…

 

3

Blommekind!

Wow!  Ek kan nie glo hoe die tyd vlieg!  Daar het heelwat gebeur die afgelope twee maande.  Sodoende dat ek so baie te vertele het, maar amper nie weet waar om te begin.

Dit gaan baie goed met Harmen, ‘n voorspoedige seuntjie.  Die lyfie raak nou die van ‘n seuntjie, niks meer baba, peuter of selfs kleuter aan die mannetjie nie.  Ook die geselsies.  Juis vandag sit ons in Wimpy en so ewe sê Harmen, ‘Ons sit by die lughawe’!  Dit is waar hy Wimpy vandaan ken, lank-lank gelede! 🙂

Harmen is ‘n seuntjie met ‘n sterk wil.  Alhoewel dit soms ‘n struikelblok is, weet ek dit sal vir hom ‘n aanwins wees in die wêreld daar buite.  Harmen pak ‘n taak aan met ywer en geditermineerdheid.  

Harmen is ‘n netjiese seuntjie.  Hy speel rof en tjof en met ALLES, maar alles het sy regte plek en mag ook nie meng.  JCB’s en Trekkers is die gunstelinge, naas sand en buite speel.  Dan soos dit ‘n seuntjie betaam, lego en karre!

Pure seuntjie, is die knieë nerf af asook naëls vol sand met vreugde en vrede in die hart.

Harmen is mal ook sy nuwe neef en nig.  Die interaksie tussen hul is dierbaar en beter as enige ‘block-buster’ film!

Die tablet word so nou en dan uitgeruk, veral wanneer energie belaaide seuntjies doodstil moet sit!  Hy is versot op sy ‘klablet’, veral omdat dit so skaars is.

Van vorms en kleure kan jy hom niks vertel.  Selfs sy naam herken hy en skryf die ‘H’ al self.  Ons volgende oefening is die volle naam.

Mamma en Pappa word deesdae aangespreek as ‘Mamma Ilze’ en ‘Pappa Herman’.  Pappa Herman het hom bekend gestel aan Robbie Wessels se ‘Peri Hoenor’ en die liedjie word kliphard en oral gesing!  Ja, selfs die kerk!!!

Pappa Herman het ook Harmen bederf met ‘n kuier aan die Western Province Live Steamers.  Wat ‘n fees!  Dis ‘n moet vir enige seuntjie, Oupa en Pappa!  Moet sê die wind deur my hare was nogal lekker.  😉

Sommer vir die ‘onthou’:

Harmen weeg +23kg

1.05m lank

Slaap vanaf 20h00 tot 06h30, soms 07h00 as na 20h gaan slapies het.  Met ‘n middag-slapie by die skool.

Dra al 4 – 5 jaar en tans nommer 10 skoene

Harmen is super lief vir sy warm ‘tops’ met ‘n ‘hoodie’ en sakke.  Wegsteek plek vir klippies en stokkies!  Tekkies is ‘n wenner en slippers ‘n moet!  Alhoewel kaalvoet is die beste vir die gemoed!

Nou moet ek eers daardie swart voetjies gaan skrop, Bernard en sy bedjie roep!  

Tot volgende keer…

1

Deel ons kindwees met Harmen!

Vannaand het ons, ons klein Kabouter bekend gestel aan ons kinderdae gunstelinge!  ‘Neels Holgerson’…  Episode 1, 2, 50, 51, 52.  Vasgenael en met n stywe druk… Aan die einde is Neels toe met ‘rus’ gelaat, by sy Pappa & Mamma.  Grootseun wat hy geword het!  More aand is dit Niklaas!  Dawie die Kabouter se temalied het ons geluister, maar na 30 jaar sien ek nog nie kans vir nog n finale episode waar Dawie in n boom verander nie!  Ons spaar Harmen die hartseer nog  rukkie.